అలరించిన సంగీత విభావరి

శ్రీకాకుళం కల్చరల్‌: స్థానిక బాపూజీ కళామందిర్‌లో రంగస్థల కళాకారుల నెలవారీ సాంస్కృతిక విభాగం 291వ నెల కార్యక్రమంలో భాగంగా శనివారం నిర్వహించిన సినీ సంగీత విభావరి అలరించింది. ఆ పాత మధురాలను వీరాస్వామి, శ్రీనివాసరావు, చంటి, ప్రవీణ్‌ మంగవేణి, ప్రభావతి, రాజేశ్వరిలు వీనులవిందుగా ఆలపించారు. ఈ సందర్భంగా పౌరాణిక నటుడు, పద్మశ్రీ యడ్ల గోపాలరావు, డీఎస్పీ సీహెచ్‌.జి.వి.ప్రసాదరావు, ఆర్‌.శివరాంలు మాట్లాడుతూ పేద కళాకారులకు నెలవారీ పింఛన్లు పంపిణీ చేయడం గొప్పవిషయమన్నారు. బలివాడ పద్మలక్ష్మీ జ్ఞాపకార్థం ఈ కార్యక్రమాన్ని ఏర్పాటు చేసిన బలివాడ శ్రీనివాసరావును సమాఖ్య సభ్యులు సత్కరించారు. కార్యక్రమంలో సమాఖ్య గౌరవ అధ్యక్షుడు ఎల్‌.రామలింగస్వామి, కార్యనిర్వాహక అధ్యక్షుడు పన్నాల నర్సింహమూర్తి, కార్యదర్శి బి.రామచంద్రదేవ్‌, రమణారావు, పైడి సత్యవతి, కంచరాన అప్పారావు పాల్గొన్నారు.